يوميات دينا ابو الوفا … عارفين

فى حديث للرسول عليه أفضل الصلاة و السلام ،انا بُحبه جداً و كتير بتأمل فى عمق معناه و كم الرسايل اللى جواه

 عارفين ايه هو ……

 ” من تواضع لله رفعه”

كل ما أردده الاقى ليه معنى و تفسير مختلف كل مره

مره أفسره ،ان من تواضع مع الناس ابتغاء رضا الله ، رفعه الله درجات فى الجنه

 و مره تانيه اجد، ان من تواضع مع الناس حباً فى الله ، رفعه الله درجات عند الناس

 و مره تالته اشعر ان من تواضع مع الناس خوفاً من زوال نعمة الله , رفع الله قدره و مكانته بين الناس

 و مره رابعه أراه ان من تواضع مع الناس ، رفع الله مراتبه اكثر و اكثر

 و مره خامسه احس ان معناه ان من تواضع لله، لإدراكه فضل الله فى ما وصل اليه فى الدنيا و لم ينكر هذه النعمه ، رفعه الله جزاءاً لشكره و حمده

 و ايا ما كان التفسير و الجزاء فى الدنيا و الاخره فهو بلا شك حق مستحق لمن تواضع

 عارفين ليه ،،،،،

 لانه اسهل حاجه فى الدنيا اننا ننجح ونكبر فى المقام و نعلى و نعلى فى المركز و نوصل للقمه و يصيبنا الغرور و نمشى نتباهى بما وصلنا اليه و ندب برجلينا فى الارض و نمشى فاردين ضهرنا و رافعين مناخيرنا فى السما متباهين بروحنا

 سهل اوى … لا مش بس سهل

 ده من اسهل ما يمكن

 الصعب بقى انك فى قمة نجاحك و مكانتك تكون متواضع عارف ليه

 لأنك بتجاهد نفسك ، مش بتسمع لنفسك الاماره بالسوء ، مش بتنساق لغرور بيجرك ليه ابليس

 فى اصعب من كده تحدى ،،، معتقدش

 خليك قوى ، أد التحدى

 خليك فاكر

 من تواضع لله رفعه ..

دينا ابو الوفا
دينا ابو الوفا

اقرأ للكاتبة : 

الحقيقه بتخليكى شخصيه لا تقاوم

شكرا للتعليق على الموضوع