يوميات دينا ابو الوفا … عارفين
بالرغم من ان حياتنا كلها من أولها لآخرها عباره عن محطات بنمر عليها واحده ورا التانيه ، الا ان الزواج بدون شك ، من اخطر المحطات و اصعب المراحل الانتقالية اللى ممكن نمر بيها فى حياتنا …..
لأننا بنلاقى نفسنا بين يوم و ليله كل حاجه فى حياتنا بتتغير ، بتتشقلب ،
بتتبدل بشكل سريع جدا …
بنسيب بيت اهلنا اللى قضينا طفولتنا و شبابنا كله بنحاول نفهمهم و يفهمونا ، نستوعبهم و يستوعبونا …
و نتنقل لبيت تانى مع شخص كان لِسَّه لحد امبارح غريب عننا …
ومن اول يوم ، بنصطدم بواقع مرير …
و هو ان فترة الخطوبه بكل التمثيل و التجميل اللى فيها كوم ، والزواج و ظهور كل شخص على حقيقته كوم تانى خالص ……
بتظهر الاختلافات فى كل حاجه ، فى الطباع ، فى الاكل ،فى الشرب، فى النوم ، فى كل تفاصيل الحياه اليوميه اللى ممكن تتخيلها و بالتالي بتتزايد الخلافات و تتطور من حين لآخر ……
و بيكون اجبارى اننا نتعلم نتأقلم وبسرعه مع الاختلافات دى ، ونتقبل الطرف الاخر زى ما هو كده …
لانها حقيقه مؤكده ان مفيش حد بيغير حد و لا حد بيتغير علشان حد !!!!!
ده فى حد ذاته تحدى كبير للطرفين اللى جامعهم سقف بيت واحد ….
و يا ينجحوا ، يا يفشلوا ، هما و شطارتهم …
ما بالك بقى لو زودنا التحدى – كمان تحدى – وكان السقف ده جامع عيله كامله ، يعنى مثلا الزوجين عايشين مع اهل الزوج او العكس …
دى من وجهة نظرى انا الشخصيه، كارثه بكل المقاييس لأسباب كتيره و خلينا ناخد زواج البنت فى بيت اهل زوجها كمثل ، مش تحيز للمرأه و لا رغبه فى الدفاع عنها لأنى من بنى جنسها ، بل ببساطه لانه اكثر حدوثاً من العكس !!!
أول هذه الأسباب ، ان مش بيكون فيه اى نوع من انواع الخصوصيه بين الزوجين ، حياتهم بتكون زى الكتاب المفتوح او حلقه فى مسلسل الكل متابعها يوميا باهتمام !!!!!!
و طبعا اللى بيتفرج ، ميمنعش من وقت للتانى انه ينتقد و يعلق و يتدخل من باب حسن النيه طبعاً !!؟؟؟
و التدخل عادة بيكون له نتايج سلبيه و بيزود الطين بله …
ثانياً : الزوجه بالعافيه يا دوب تتأقلم مع جوزها ، لكن مع العيله هتتاقلم مع مين و لا مين ، هترضى ماما ولا تقضى طلبات بابا !!!!
ثالثا : الزوجين عادة برغم الخلافات اللى بتظهر بينهم ، الا انهم مع الوقت بيصفوا لبعض و ينسوا و يعدوا مطبات الحياه …
لكن فى وجود ام ربت و كبرت ابنها الحيله ، صعب اوى تفوت لمراة ابنها انها زعلته ، وهتفضل شايله و احتمال كبير تلعب دور البنزين جنب النار …..
رابعاً: فى وجود امرأتان داخل نفس البيت ، مين فيهم هتكون ست البيت ، مين هتكون صاحبة الامر و النهى ، الزوجه ام الام !!!!
عدم احساس الزوجه بالاستقلاليه عن المحيطين بيها محبط و كئيب …
و اعتقد انك لو خيرت اى زوجه فى الدنيا بين انها تكون “سيده القصر” فى بيت صغير متواضع او انها تكون “سيده على الهامش” فى قصر كبير …
لاختارت الأول بالتأكيد …
اقرا للكاتبة :
