يوميات دينا ابو الوفا … عارفين
عارفين حياتنا فى الدنيا عامله زى ايه بالظبط ؟!؟؟
…..لجنة امتحان
و من المفترض ان الامتحان فى الدنيا يكون من ابسط و اسهل ما يمكن لأننا نعرف الاسئله و الاجوبه مسبقاً من خلال علمنا بتعاليم ديننا و علمنا بكل ما هو حلال و كل ما هو حرام
الا اننا لما بنمسك ورقة الأسئلة بنبصلها باستغراب شديد و دهشه عجيبه!!!!
شوية اسئله بنجاوب عليها صح و شويه تانيين بنجاوب عليهم غلط و نحتار فى الباقى !!!!
على فكره مش دى المشكله لانه طبيعى ان ناس قليله جدا اللى بتقفل الامتحان و دول المجتهدين قوى الشاطرين قوى اللى أقرب للملايكه ،لكن ربنا خلقنا بنى أدمين و هو عالم اننا سنخطىء و ان الامتحان مهما بدا سهلا فهو فى الحقيقه السهل الممتنع !!!
المشكله الحقيقيه مش فى اننا مش بنقفل الامتحان
الكارثه فى اننا عمرنا ما بنعرف امتى هتتسحب ورقة الامتحان و يا ترى لما الورقه تتسحب من أيدينا هنكون حصلنا نمرة النجاح و لا لا !،؟،
علشان كده بجد خساره قوى لحظه تفوت من عمرنا منعملش فيها خير ، منعملش فيها حاجه صح لوجه الله تعالى
ابتسامه فى وش حد حزين ، كلمة حلوه تجبر بيها خاطر ،طبطبه على كتف غلبان ، كلمة حق تقولها فى لحظة ظلم ، دمعه تنزل من عينك علشان حسّيت بضيقة حد ، إيد تمدها لحد الدنيا كسرته، حاجات كتير صغيره ممكن تجمع بيها نمر تنجحك و انت مش حاسس
يا رب توفنا و احنا ناجحين
