يوميات دينا ابو الوفا … عارفين
بتعدى علينا أيام بيكون صعب علينا اوى فيها، اننا نتكلم مع حد أو نسمع حد أو ندير حوار من أساسه ….
بنفقد بالكامل ، الاهتمام بأى حاجه ممكن تتقال لنا ، وبنستتفه كل المواضيع اللى ممكن تتفتح قدامنا ، وقدرتنا على استقبال اى معلومة بتكون أقرب ما يكون الى الصفر ……
بنسمع الكلام و لا كاننا سمعنا اى حاجه ، بيدخل من ودن و يطّلع من التانيه …..
بنبقى عايزين نقول للى قدامنا الله يباركلك ابعد عنى دلوقتى، مش مستحمله…. مجرد اقترابه مننا ،عبئ مش قادرين عليه …
بيكون لسانا متلجم ، و كاننا مكسلين نرد او نسينا مفردات الكلام !!!!!
ولو تليفونا رِن ، ممكن نفكر الف مره قبل ما نرد و نفضل باصين له باستنكار ” بترن ليه دلوقتى ، شايفنى مستحمله ” …
والله مش كره فى اللى بيتكلم ، لا لا .. مش كده ، لانه الحقيقه بعضهم بيكون عزيز علينا و من اقرب الناس لينا كمان ….
بس بتكون النفسيه محتاجه كثير من الهدوء ، الصمت ، السكوت ، ربما .. كلهم مترادفات …..
و لو كنت اعرف مرادفات تانيه بنفس المعنى لاستخدمتها للتأكيد و الإصرار …
بتحتاج النفسيه وقتها لحدوث “لا شىء” ، ان تتوقف الناس عن الحركه ، عن الكلام ،
ان يتوقف كل شىء حَوْلِك حتى الزمن ، حتى صوت عقارب الساعه مش قادر تسمعها …..
و كأنك بتتمنى لو تقدر، تلغى الوجود حولك لتستعيد وجودك …
اقرأ للكاتبة :
الزوجة محتاجه حب و اهتمام و حنيه و تقدير و رحمه و موده و امتنان و احترام …
