يوميات دينا ابو الوفا … عارفين
الزمن بقى غير الزمن و كل حاجه اتبدلت و اتغيرت ….
و من ضمن الحاجات اللى اتغيرت بشكل كبير هى العلاقة الزوجيه ….
كان زمان اوى ايام جدودنا ، الزوجه بتعتمد كليا و جزئياً على الزوج …
و ترضى بكل اللى بينعم عليها بيه …
لو موسم او عيد او خلافه ، يجيبلها مثلا فستان جديد ، او شنطه او حتة دهب ، هو و ذوقه !!!!!
يصرف على البيت براحته ، باللى يجود بيه ….
و لو بختها مش قد كده ، ووقعت فى زوج قاسى ، جامد ، عنيف ، بخيل ماديا او فى مشاعره ،تستحمل العيشه ما أصل ضهرها للحيطه، مفيش قدامها مفر من الصبر و الصمت و احتساب أجرها عند الله …
و أهى قاعده تربى العيال ، و أيام و بتعدى كلها شبه بعضها …
تحط أيدها على خدها و دموعها نازله المسكينه ….
هتروح فين الغلبانه ، ترجع بيت اَهلها مثلا … يا دى العيبه !!!!!
و تروح فين و تيجى منين و تصرف ازاى و تربى ولادها منين …
تفضل مستحمله عيشه صعبه لان خياراتها “صفر” !!!!!
دلوقتى بقى الموضوع اختلف تماماً و الست بقت متعلمه تعليم عالى ، و بتشتغل و ليها دخل كبير ، احيانا يفوق دخل جوزها !!!!
بقت مثقفه ، مستقله ، قويه ، لا تعتمد على جوزها ماديا …
و اذا حصل و اتجوزت راجل مش سعيده معاه ، مفيش حاجه تجبرها انها تستمر معاه ، اللهم الا ولادها ، لو هى أم حنينه اوى يعنى ودوّل على فكره مش كتير فى الزمن ده !!!
لكن علشان ضهرها للحيطة او انها مكسورة الجناح و ان مقدمهاش حل تانى …. لا لا و الف لا …
من هنا بقى ، لازم الراجل يفهم انه لازم يقدم للزوجه حاجه تفوق الماديات …
لانها ببساطه مش محتاجاها …
هى محتاجه اللى مش هتلاقيه لوحدها …
محتاجه حب و اهتمام و حنيه و تقدير و رحمه و موده و امتنان و احترام …
محتاجه معنويات ….
لو لقيتها لا يمكن تفرط فيك او تفكر تدور ضهرها و تمشى …
لكن لو ملقتهاش ، هتفكر مية الف مره قبل ما تقرر تستنى معاك …
اقرأ للكاتبة :
