نانسى فتوح تكتب : أكيد هتبقى أجمل..
ليه حياتنا اتغيرت، وليه الدنيا اتغيرت؟
هي دى حقيقتنا ولا دى صورنا؟
السبب في مين؟ في الدنيا ولا فينا، ولا في الظروف اللي غيرتنا، مهو يانغير الزمن يا أما الزمن يغيرنا.
مهما الواحد مر بصعوبات كانت الدنيا حلوة برضو، والظروف الصعبة بتمر على الناس كلها، بس كنا بنقدر نتخطاها بالصبر والإيمان بالله، وبالتهوين على نفسنا ونقول دايما اللي جاي احلى وأحسن .
ليه مبادئ الناس اتغيرت، والاصول كمان اتغيرت؟
لا ليس الزمن بل نحن.. نعم نحن من غيرنا الزمن.
الناس مابقتش هي الناس ..راحت فين الكلمة الحلوة اللي من غير اي تكلفة اللي ممكن تغير حال من حال في لحظة ..
راحت فين المجاملة الحلوة اللي مش هتكلفك حاجة خالص وهتطيب بيها خاطر أي حد أو تراضيه ..!
ليه بقينا ندور على مصلحتنا ونسينا حاجة اسمها العدل والمساواة.!
راحت فين القلوب النقية اللي بتتمني الخير لكل اللي حواليها من غير حقد ولا كره ولا لوع ، القلوب البيضاء المليانة خير و حب وبس ..!
راحت فين الضحكة الحلوة اللي بتطلع من القلب و بتسعد باقي القلوب اللي حواليها ..!
راحت فين الجدعنة من البعيد قبل القريب، راحت فين سؤال الجيران على بعضهم ووقفتهم جنب بعض في المناسبات والظروف الوحشة قبل الحلوة ..!
راحت فين الرحمة اللي المفروض تكون بتجري في دمنا على طول ، راحت فين الانسانية بين البشر ، راح فين التسامح، راحت فين المودة، راحت فين الحنية .!
راحت فين المشاعر النبيلة بين البشر، راح فين حسن النية اللي مابقالوش وجود، راحت فين القيم والمبادئ، راحت فين كل الحجات دي!!.
حد يقوللي ليه بقينا كده …؟ ليه الكلام اللي بيطلع مننا بقي رصاص حي يقتل أي مشاعر..ليه المجاملة بقت بتتقال بالعكس، الكلام رخيص ومافيهوش مجهود ده حتى بيقولوا الكلمة الطيبة مفتاح للقلوب المغلقة ..
ليه كل واحد بقي متحفز للتاني ومستني له علي غلطة وعايز يتخانق عشان يطلع غلبه و ضيقته علي التاني !
ليه مابقناش نتمني الخير لغيرنا وقلبنا بقي مليان سواد و بس !
ناس كتير بقى همهم يوقعوا الناس في بعض ولما يشوفوا اي علاقة حلوة بين اتنين يحاولوا يفشلوها ..
ليه مابقاش عندنا رضى باللي في ايدينا، بقينا نبص علي اللي في ايد غيرنا، مع اننا ممكن نحمد ربنا علي اللي في ادينا، ليه بقت المصلحة هي الهدف الحقيقي لأي علاقة ولأي قرب..!
حتى وشوشنا بقت علي طول مكشرة ، مافيش صبر و لا تسامح ولا رحمة ، مع ان ربنا قال إن مع العسر يسر.!
راح فين عدل الأم والأب بين الأولاد عشان يطلعوا أولاهم بيحبوا بعض ويتمنوا الخير لبعض، ليه الناس بتقلب نفوس على نفوس عشان فاكرين انهم هيطلعوا بمصلحة وفي الاخر مش كسبانين حاجة..!
ليه بقينا نستغرب لما نشوف الخير وحتى لما بنضحك بنقول خير اللهم اجعله خير..!
الصداقة اختفت من حياتنا وبقينا نخاف لو لقينا حد طيب و شهم و جدع، الآيه اتقلبت ليه ؟؟ العيب فينا ولا في الزمن..؟؟؟
لاء..العيب فينا لو كل واحد صفي نيته لله، ولو كل واحد رضي عن حاله، ولو كل واحد يحمد ربنا و يشكره على نعمه الكثيرة و يعمل كل اللي عليه عشان يحافظ على النعم اللي ربنا ادهاله، ولو كل واحد بقي عنده يقين في ربنا انه كاتبله الأحسن والخير ، ولو كل واحد قرب لربنا بطريقته، صدقوني ربنا كمان هيقربله وما اجمل قرب الله من عبده..تخيل كده معايا هتبقي حياتنا ازاي.. أكيييد هتبقى أجمل..
اقرأ للكاتبة
نانسى فتوح تكتب : الحياة صعبة و لكن أعطاك ربك الحل
