نانسى فتوح تكتب :ولاد الناس وولاد الأصول

هو ايه الفرق بين ولاد الناس .. و ولاد الأصول ؟؟؟

 في خمسينيات القرن الماضى جسدت الدراما المصرية فيلماً بعنوان “أنا بنت ناس” لسيدة الشاشة العربية فاتن حمامة، كانت معاييرها أن ذاك أن تكون من أسرة ثرية ذات أصول عائلية عريقة، ولكن هل اختلفت تلك المعايير الآن في ظل اختلاف الثقافات وتغير الفئات داخل المجتمع الواحد تحت مظلة تكنولوجيه واسعة جعلت العالم غرفة واحدة ؟!

لما نتأمل الموضوع ده شويه هنلاقى حاجة مهمة أوى :

– مش كل ولاد الناس .. ولاد أصول ..

– لكن كل ولاد الأصول .. ولاد ناس !!!

في ناس كتير أوى ، ولاد ناس كويسين ومحترمين و من أسر عريقة ومعروفه ، لكن … للأسف مربوش ولادهم كويس.. أهملوا في تربيتهم .. سواء لمشاغل ، أو دلع ، أو إعتمدوا على الشغالات بالذات الأجانب أو .. أو .. أو .. ممكن تكون في أسباب كتير ..

المهم إن نتيجة كده إننا بنشوف ناس تبقى مستغرب أوى هو ازاى ده من عيلة كذا أو إبن فلان وفلانه .. ولاد ناس ، بس مش ولاد أصول !!

في المقابل في ناس بقى بيبانوا عاديين جداً .. لكن لما تتعامل معاهم تلاقيهم مهما كان وضعهم المادى أو الإجتماعى أو الوظيفى .. ((( ولاد أصول صحيح(((..

-عندهم أخلاق ، تلاقيهم محترمين ، شبعانين ، جدعان ، أصحاب فضل ، و أصحاب واجب ..   يعنى اللى اتربوا على الأصول و الأخلاق، و احترام الغير، و تقدير مشاعرهم مهما كان غنى و لا فقير- كبير أو صغير‏.

– عندهم عزة نفس .. تلاقيهم مكسوفين أوي إذا أخدوا من حد حاجة .. أو إدوا حد حاجة .. مكسوفين في الحالتين ، الأخذ والعطاء ..

– عمرهم ما يمنّوا على حد بعطائهم أبداً.. وعمرهم ما ينسوا فضل حد عليهم ..

– يقفوا جنبك فى كل المواقف حلوة أو مُره .. ويراعوا مشاعرك ويحافظوا عليك ..

– اللى يغلط فيهم بيسامحوه إذا قدروا عليه .. و اللي يغلطوا فيه ميتكسفوش ابداً يعتذروا له مهما كان أقل منهم ..

– يساعدوا اللى يقدروا يساعدوه من غير تفكير .. عمرهم ما ياكلوا معاك عيش وملح ويتكلموا عليك أو يضربوا فيك من وراك ..

– لما تحتاجلهم تلاقيهم على طول أقرب ناس لك ، يسندوك ويقوّوك ويقفوا جنبك ومعاك بعد ربنا ..

– تأمنهم على نفسك وبيتك ومالك و إنت مطمن من غير قلق ..

– لو عرفوا عنك حاجة وحشة يخفوها ويستروا عليك .. و لو عرفوا عنك حاجة كويسة يفرحوا لك من قلبهم ..

– لو سمعوا عنك كلام وحش في قعده يردّوا غيبتك .. وحتى لو زعلوا منك ميجيبوش سيرتك بأي حاجة وحشة ..

الراجل ابن الأصول عمره مايغلط ف أهل مرآته مهما حصل بينهم من مشاكل .. المشاكل بتحصل في كل بيت، لكن ابن الأصول هو بس اللي عمره مايغلط .

الراجل ابن الأصول هو بس اللي وقت المشكله عمره ماهيوصل مراته أنها تكرهه .. ممكن يحصل زعل وخصام لكن عمره ماهيعمل فيها حاجه توصلها لكرهه .

 الراجل ابن الاصول هو اللي ينفذ وعوده لمراته أيام الخطوبة ومايمشيش بمبدأ “خلاص بقت تحت أيدى”..

الراجل ابن الاصول هو اللي يعرف إن سعادة مراته مش في إنه بيجبلها كل اللي نفسها فيه في مقابل إن مفيش يوم مينكدش عليها فيه ..!

 فـ السعادة لا تأتي في المال يا سيدي .. الرجل هو السعادة النفسية مش شوية فلوس ..

الراجل ابن الاصول عارف من جوه نفسه انه راجل ومش مستني فرصه يثبت فيها ده أو يستغل ضعف مراته عشان يثبت رجولته ..

الراجل ابن الأصول هوه اللي عارف إن مفاتيح السعادة في أيده هو مش في أيديها ،وسعادتها هتخليه أسعد إنسان على وجه الأرض لإنه ساعدها مش منكد عليها ..

يقول الناس دا أبن أصول ودا معندوش أصل لتصرفه بخسه وبوجهان وخيانة أصدقائه، ف قليل الأصل يأكل مع صديقه في طبق واحد ومن ورا صديقه يتكلم عليه بالباطل ويحقد عليه ويسرقه.. ساعتها نقولها بعلو الصوت دا قليــــــــل الأصل ..

وحتى كلمة (ابن الناس) في ناس كتير فهماها غلط

ولاد الناس مش ب اللبس و العربية و إني أحط رِجل على رِجل و افتكر إن مافيش من بعدي، ولا إن في كل كلمة أقول “انا ابن ناس” لا ده نقص مش أكتر ..

ابن الناس بأفعاله بكلمته اللي مايرجعش فيها مع الناس .. اللي لما يقول كلمة ينفذها حتى لو على رقبته، يعني يوعد ويوفي .. ، و ابن الناس اللى بجد بيبان ف مواقفه معاك يعني مثلاً مافيش ابن ناس يشتم ف صاحبه ف غيبته، و يعيب فيه و يقول عليه اللي الغريب مينفعش يقوله.

و الناس مواقف .

ولاد الأصول حاجات كتيرة أوى .. وفعلا لما تفكر شويه حتلاقى :

 مش كل ولاد الناس ولاد أصول ..

قيل ليوسف عليه السلام: ما لك تجوع و أنت على خزائن الأرض؟ ، قال أخاف أن أشبع فأنسى الجائع.

يارب كلنا نتعلم ازاي نبقى ولاد أصول عشان ترجع المبادئ بتاعت زمان اللي اتربى عليها آباءنا و أجدادنا، وياريت مانقولش كلمة “أصل الدنيا اتغيرت .. والجيل مابقاش زي الجيل.. ومابقاش في خير في حد .. والوحشين بقوا أكتر من الكويسين”.

ياريت ترجع ثقتنا تاني في الناس وده مش هيرجع إلا اذا اتغيرنا ورجعنا للأصول والمبادئ بتاعت زمان .. عشان كدة في فرق كبييير أوي بين ولاد الناس وولاد الأصول.

اقرأ للكاتبة

نانسى فتوح تكتب : اسقوا زرعكم ولا تحوجوه لماء الآخرين ..

شكرا للتعليق على الموضوع