حوار مع الطفل الذي ابكانا في مسلسل الوسية
اعداد وحوار: أبو العز صبرى
التقيت بالفنان الجميل احمد عزت وسألته فالبداية
من امتى بدأت عندك موهبة التمثيل؟
اهلا بيك يا ابوالعز احنا اصدقاء عالفيسبوك من زمان وسعيد اننا اتقابلنا عالطبيعة الموضوع مجاش فجأة انا بدخل التلفزيون من وانا طفل رضيع لان اخويا الكبير سبقنى في التمثيل وكانت والدتى بتروح معاه وتصطحبني معاهم بالطبع وبالتالي بدأت اشوف الكاميرات والممثلين ومكانش عندي رهبة من التمثيل ولا من الكاميرات ومن دور صغير لدور اكبر والحمدلله نلت اعجاب المخرجين والفنانين والجمهور، تقدر تقول انا لقيت نفسى جوا مبني التلفزيون مش انا اللي سعيت للتمثيل.
مين اول من اكتشف حبك للتمثيل؟
أمى هى المحرك الاساسى وهيَ اللي كانت بتسعي اننا نكون متواجدين انا واخويا طبعا قبلي لانها حست بموهبتنا ولما اثبت وجودي بقيت بنطلِب بالأسم وكانت أمى هي اللي بتقيم السيناريوهات وتشوف الدور هيليق عليا والا …لا ،وكانت بتحفظني السيناريوهات وتفهمني دوري لحد ما بقيت اعرف اقرأ واحفظ مع نفسي ،عندك مثلا مسلسل الوسية في مشاهد كنت شايفها بدماغي ومرتب ازاي هعملها من قبل المسلسل بشهر والحمدلله خرجت المشاهد بشكل لاقي استحسان الجميع.
عاصرت في طفولتك وشاركت مع عمالقة الفن من اقربهم الي قلبك؟
اللي حبتهم قوي هما اللي اشتغلت معاهم مع احترامي للجميع عندك مثلا الاستاذة محسنة توفيق والاستاذة فردوس عبد الحميد والاستاذ محمد الدفراوي كنت بحسه والدي فعلا مجموعة كبيرة ارتبطت بيهم نفسيا وفنيا انا طبعا كنت طفل صغير مش مدرك قيمة النجوم اللي بمثل معاهم لاني لو كنت حاسس بده كنت هخاف وهتكون في رهبة كنت بحس اننا ممثلين زي بعض وده طبعا كان في مصلحتي .
كمان منساش العملاق عبد الله غيث والفنانة عفاف شعيب في مسلسل حارة الشرفاء بستغرب نفسي لما بفتكر اني مثلت قدام القامات والنجوم دول كلهم ولو قولتلي كرر المشاهد دي دلوقتي مش هعرف الواحد زمان وهو طفل ومن تكرار الشغل كان عنده ثقة في نفسه وفي اداءه للادوار يعني لحد مسلسل الوسية كنت شاركت في حوالي ستين او سبعين عمل فني اكثرهم في التليفزيون لكن كمان شاركت في السينما والمسرح وبرامج الأطفال.
مين من الاطفال اللي مثلوا معاك كنت بتغير منه غيرة فنية او معجب بتمثيله؟
اللي كنت بحس ان شاطر جدا وسام حمدي واحمد عقل، وسام كان مميز في السينما وانا في الدراما التلفزيونية ، كان صعب نتقابل كتير في الادوار او تجمعنا مشاهد، معروف ان وسام الواد الحليوة ابو شعر اصفر وعيون ملونة في السينما، انما احمد عزت الواد المتكحرت ابو شعر مش عارف عامل ازاي( ضحكة من القلب من فنانا الجميل) وعلشان كده كنت انا في الدراما التلفزيونية اكثر من السينما.
ليه ما التحقتش بالمعهد العالي للفنون المسرحية او اكاديمية الفنون؟
كان قرار من بعد مسلسل الوسية ان انا مكملش في الفن علشان كده دخلت كلية التجارة واتخرجت كان عليا كمية ضغوط رهيبة وانا طفل التمثيل مش سهل.
اعتقد انك ما عشتش طفولتك زي اي طفل عادي؟
نهائي نهائي نهائي انا كنت بعمل مهام معينة بروح مدرستي وبعد كده اروح شغلي وبقي التمثيل شغلي فعلا مش مجرد هواية، بقي التزام ومواعيد من كتر الاعمال اللي كنت بنطلب فيها، كانوا اصحابي واحنا خارجين من المدرسة يتفقوا هيلعبوا فين ويتفسحوا ازاي وانا ماسك السيناريو احفظ فيه لحد ما نركب المترو، احنا كممثلين اطفال معشناش طفولتنا صح بس لما كبرنا حسينا بقيمة المجهود اللي كنا بنعمله واحنا صغيرين وكونك تشعر انك مميز او مختلف ده شئ ممتع الحمدلله، والاكتر حب الناس وارتباطهم بيك وانهم لسه فاكرينك.
في مواقف معينة محفورة في ذاكرتك ما تنساهاش؟
في فيلم شاركت فيه مع استاذ مجدي وهبه وفي لقطة البيت بيتحرق وانا جوا البيت وجابوا كمية قش كبيرة وولعوا فيها وانا سامع صراخ امي برا وهيا بتقول هاتولي ابني عاوزة ابني هو راح فين ومش قادر اكلمها عشان التصوير، وكمان في مسلسل حارة الشرفاء كنت علي كتف الاستاذ عبد الله غيث وبهتف وبعدين انضربت بالرصاص وكنت اول طفل شهيد في المسلسل واللي بتقوم عليه قصة المسلسل لما اخدت الطلقة المفروض المشهد بيتقطع وبعدين بنزل عالارض ويحطوا الدم لكن انا حبيت اجود في المشهد فوقعت بجد من علي كتف الاستاذ عبد الله غيث وامي قعدت تصرخ لانها توقعت ان الرصاص حقيقي واني انصبت بجد وانا سامعها وبرضو مش قادر اقول لها انا بخير عشان التصوير والكاميرات .
المخرج اسماعيل عبد الحافظ بيمثل ليك ايه؟
بعتبره والدي اول حد حس بموهبتي وقدرها واقتنع بيها ووظفها صح ، اشتغلت معاه الوجة الاخر سنة 1987 وليالي الحلمية جزء اول و جزء ثاني والوسية سنة 1990 .
شهر رمضان اكيد كان وش الخير عليك؟
طبعاااا ده الموسم بتاعنا كنت بطلع في بوجي وطمطم ومسلسل لا اله الا الله وبرنامج اجمل الزهور يعني ممكن اكون مشارك في اربع او خمس اعمال كان طبعا شهر الخير والبركة.
هل اصابك الغرور في وقت من الاوقات؟
بالتأكيد اصابني الغرور، طفل عليه كمية ضغوط رهيبة والناس مركزين معاه وبيمثل مع اكبر النجوم ومحط اهتمام واعجاب الجميع وحاسس بقيمة نفسك وفنك فبتلاقي نفسك بتتعامل مع الناس بطريقة مختلفة علشان كده اطفال كتير مننا بيبقوا محتاجين علاج نفسي بعد ما بيعدوا من المرحلة دي لان كتير منهم مبيعرفش يكمل حياته بشكل طبيعي بعد كده.
تلغراف توجهه لجمهورك؟
وحشتوني جدا جدا واتمني اقابلكم تاني.
في النهاية شكرت استاذ احمد لسعه صدره ومحبته.
اقرأ ايضاٍ
في حوارها لـ “التلغراف” إنجي صالح: لا ترضوا بالقليل من الأدب..
