الحق المهضوم… “قصيدة زجلية” محمد سعيد الأندلسي
الشاعر المغربي: محمد سعيد الأندلسي
ولدتيني يا يما وعلمتني نقول الحق ولو في حبابي
ربتيني وعلمتني كيف نتعامل مع الناس وصحابي
قرتيني ووريتيني كيف نكون محب لديني وطني ومانكون لا مجرم ولا ارهابي
قريت وكافحت يايما وحلمت نكون غير أستاذ
لكن كاين لي مادار والو حيت باباه فلان وطلعوه على حسابي
واش يرضيك يايما اولادك يسيل دمهم حيت طالبين حقهم هادي سنين
واش يرضيك يا يما بناتك قلبهم يتقطع ودمعتهم تتعصر من العين
واش يرضيك يا يما يخاليونا مقهورين نكمدو جراحنا بحزن وانين
وكلنا عارفين شكون لي خيبنا ومرغ جبيننا في الوحل والطين
عارفين شكون لي مدارو والو زين
كيعرفو يزيدو غير في الماء والضوء والزيت والغاز والسكر والطحين
لي عاندهم غير مع الدرويش والمسكين
مدوزيين لافير مع بعضهم وعايشين
طبعا منقدوش على دوك المفلسين
راكم عياقتيو يابنادم باركا علينا من الكدوب وباراكا من اللعب والكوميديا وبراكا من قلة الدين
ابنادم ..ابنادم ..ماخليتو حتى شي حاجة في هاد البلاد زين
باركا علينا من الوعود الخاوية وباركا الشعارات وباركا من العجين
كتعرفو تنضمو غير طنجاز وتويزا وموازين ياقلالين الدين
البرلماني يتخلص وخا يقايل ناعس وكتفكرو تسوفو دم المسكين
البرلمان رجاع برنامج كوميديا ناقصوغير جاواج وباسو ومميح وجمال ونورالدين
ياما ولادك قراو وتعلمو وعاعدونا باش نخدمو وخلاونا مهمشين
بالجوع والسمر خالينا راسنا ناقصين
اوا هاحنا وصلنا لهدفنا واش ما بغيتوشي تشوفونا واصلين
مابغيناشي شي حاجة مستحيلة بغينا غير نكونو في عملنا مستقرين
اولادكم كتقريوهم في احسن المدارس في اروبا وامريكا وحتى في الصين
واحنا بغيتو ولادنا يبقاو ديما مكلخين
الميساج راه واضح لي فهم راه فاهم ولي مفهامشي غير يدفن راسو مع الميتين..؟؟
اقرأ ايضاً
ضيعت روح القصيدة… “شعر” ايمان عامر
