مرار الغربه

مرار الغربة ايه احساسك ؟

وانت ف غربه بعيد عن ناسك

 زى الطفل خدوه من أمه

زى التايه جوا الزحمه

 نفسه ف حضن أمان يضمه

اللى يغيب عن وطن الدار يلقى الشهد ف بقه مرار

 كل هموم الدنيا تغمه ايه احساسك ؟

وانت ف غربه بعيد عن ناسك

يااااااه ع الحرقه ف وجع الروح لمّا بتبعد عن أحبابها

يااااااااااه ع الفرقه ولا مرارها ياناس وعذابها

فين الشله وفين اللمه؟

فين الخاله وفين العمه؟

لما تلاقى نفسك سارح تلقى الورد ف إيدك جارح

حتى الانفاس خنقه وذمه

ايه احساسك لمّا حنين الشوق يندهلك

ولاّ انين الذكرى لأهلك

 لما بتسهر وانت وحيد عمرك كله قضيته بعيد

 أغلى حبايبك مات ولا شفته

جبت المال من وجعك عفته ايه احساسك؟ّ

عايز تعرف ايه احساسى

 وانا محروم من أهلى وناسى ياااااااااااااه مآسى

 باشرب مر الحزن ف كاسى

عايز تعرف ايه احساسى

بص ف ورده تكون دبلانه

بص ف ضحكة وش يتيم

بص ف أرض شراقى جفاف

ولا عيون ف الليل بتخاف

عايز تعرف ايه احساسى وانا ف الغربه

وانا محروم م الأهل وقــُربه

زى الميت ناسه سابوه جوا القبر لوحده ف تربه

 عايز تعرف معنى الكربه

اسأل واحد سافر جرّب

اسأل واحد تاه عن أهله يوم واتغرّب

اسال واحد كان عطشان جوّا الصحرا

شاف الميه بعيد تتسرّب

ده احساسى وانا ف الغربه بعيد عن ناسى

 باشرب مر الحزن ف كاسى

 باشرب مر الحزن ف كاسى

قصيدة الشاعر : راضى على الطهطاوى

 

شكرا للتعليق على الموضوع