يوميات دينا ابو الوفا … عارفين
عارفين الذره …. الذَرّه مش الذُره !!!!
ايوه بالظبط الذره اللى كنّا بندرسها فى الكيميا زمان…..
على قد ما كنت مش بتفاعل نفسياً و لا ذهنياً مع الكيميا و انا صغيره الا ان شكل الذره ساب فيه أثر و عجبنى و عمرى ما نسيت شكلها
من غير ما أطول عليكم ، أنا بعتبر ان تركيبة الذره دى لازم تكون فى حياتك القاعده اللى تشكل بيها علاقاتك بكل من حولك !!!!
أقولكم ازاى ،،، ركزوا
أعتبر النواه اللى فى المنتصف هى قلبك محاط بدواير كثيره …
الدوائر دى فيها اللى قريب و فيها اللى بعيد من النواه اللى هى قلبك ….
و على كل دايره بنلاقى بروتونات و نيوترونات و اليكترونات ….صح !!!!
أهو دول بقى يمثلوا الناس اللى فى حياتك
يعنى !!!!
يعنى لازم تنقى بدقه و حرص اللى تحطه فى الدايره اللى قريبه اوى من قلبك لأن ده أكتر واحد يسعدك او يوجعك
اكتر واحد ينفعك او يضرك
اكتر واحد يحييك أو يموتك
و خلى فى الدواير البعيده الناس اللى بتعتبرهم معرفه و بس
لا يقرب من قلبك و لا يقدر يهز كيانك
و تأثيرهم عليك ضعيف جداً يكاد يكون معدوم
و ما بينهم الناس اللى فى حياتك فى المنتصف .
أهم حاجه فى وسط النظرية دى راعى شرطين أساسيين
أولهم ،أن كل من حولك هم من يحددوا موقعهم فى دوائر حياتك بناءاً على تصرفاتهم ، أفعالهم و مواقفهم بمرور الوقت بس اكيد مش بناءاً على كلام فى الهوا بيتقال ….
تانى حاجه انك تبقى يقظ ، مستعد و قادر فى اى وقت تحرك اى حد من دايره للتانيه
بمعنى اللى يتضحلك انه ميستاهلش يبقى قريب من قلبك إنفيه بعيد بسرعه و اللى تتأكد انه يستاهل قربوا من قلبك …..
اقرأ للكاتبة :
