يوميات دينا ابو الوفا … عارفين
دار بينى و بين صديقتين لى اليوم حوار ظريف و لطيف لكنه فى مجمله خطير و كبير ،،،
كان الحوار عّن الرجل المصرى العظيم !!
اه والله رجل عظيم …..
اللى طول النهار مش بيعمل حاجه غير انه بيندب حظه انه أتجوز مصريه
و انه يا حرام يا حرام متجوزش سوريه ولا لبنانيه !!
كانت زمانها مدلعاه و مستتاه و مريحاه و مهنناه و ايييييييييه …..
الحقيقه لما بسمعهم بتبقى الدمعة هتفر من عينى من القهره عليهم !!
فى خلال الحوار مع صديقاتى ترددت اسئله كثيره منهم و كان طبعاً ليها عندى الرد و التفسير المتواضع
سالونى هم ليه الرجاله بيموتوا كده فى الست السورية و اللبنانيه
و ليه اى حاجه صغيره تعملها تبقى جمل عندهم
و احنا قايدين صوابعنا العشره شمع و مش عاجب و مفيش حتى شكرًا تبل الريق ،،،،،،
قلتلهم الحقيقه الموضوع ملوش اى علاقه بالجنسيه ،،، يعنى مش قصه مصريه و لا سوريه و لا لبنانيه !!
دى قصة تربيه و ثقافه و تقاليد ،،،
اه و الله ….
الست المصريه بتتربى فى بيت اَهلها على مفاهيم معينه خاطئة او صحيحه مش قصتنا ، بس المفاهيم دى هى اللى وصلت الست المصريه انها مش عاجبه !!!
اتربت البنت المصريه على ان جمالك و أنوثتك مش اهم حاجه !!!
شعرك مش مشكله ، ضوافرك مش قصه ، جسمك مش أساس
اهم حاجه تبقى زوجه جدعه تقفى يا حبيبتى جنب جوزك ، ايدك بايده ، تبنى بيتك معاه طوبه طوبه ، تشيلى الهم معاه ، تشمرى يا حبيبتى و تشتغلى زيك زيه ، تجيبى قرش يسند الزير !!!
متطلبيش منه فوق طاقته ، فى أولويات يا حبيبة أمك ، ولادك ، مدارسهم ، تعليمهم، لبسهم ، خروجهم ، فسحهم ،
تعالى على نفسك ميجراش حاجه ، سنة الحياة يا قلب أمك !!!!
تكبر البنّت وخداها الجلاله و شاهره سيفها و داخله تحارب الدنيا و الزمن معاه !!!
و لانها بتعمل كل ده عن طيب خاطر و بناء على توجيهات الام الحبيبه عمرها ما بتحسس جوزها انها بتقدم اى حاجه او انها بتضحى بأى حاجه و أولهم نفسها . و هو طبعا لانها مَش بتقف تعدله العطاء اللا نهائى اللى بتعمله هو بياخد الأمور ببساطه و تلقائيه و كأن استهلاكها ده عادى !!؟
مش بيشوف انها بتضحى تعيش دور الست كامله الانوثه اللى كل اللى شاغلها شعرها هتصبغه لون ايه و ضوافرها كاريه و لا روند !!!!
بشرتها هتشدها عند مين ، و حواجبها هترسمها ازاى !!!!
اه و الجيم علشان القوام الرشيق الله يخليك
و لا ال شوبنج ،،،سيبلى يا حبيبى دشليون جنيه علشان محتاجه حاجات
ده بقى اللى بيتربى عليه ستات الجنسيات الاخرى و لهم كل الاحترام لانى شايفه أنهم صح و احنا غلط
الست اللبنانيه و السوريه بتتربى على درس واحد بس تحفظه و تطبقه …..
انها اولا و اخيرا ست كل شغلتها انها تبقى حلوه و رشيقه و رقيقه و دلوعه و بس
ازاى بقى الراجل يوفر لها كل ده مش قضيتها !!!!!
ييجى بقى الراجل المصرى العظيم يشوف واحده منهم من بعيد و هاتك يا ندب على بخته و حظه و قسمته ووكسته !!!!
ده على أساس ان الست المصريه الحقيقه جابت الديب من ديله و اخدت المنتج المصرى الأصيل اللى مفيش زيه.. يلا !!
اقرأ للكاتبة :
