يوميات دينا ابو الوفا … عارفين

دار بينى و بين بنتى الكبيره حوار طويل شيق كما هى معظم حواراتنا

 ابتدى بسؤالها ليه عن مستقبلها الدراسى …. اعمل ايه يا مامى !!!!

و لانها داخله على مرحله لازم تبتدى تحدد فيها اتجاهاتها ، حسّيت من تعبيرات وشها و نبرة صوتها بقلق و توتر و خوف يمكن يوصل لدرجة الرعب

 لمجرد انها مش عارفه تختار

اللى خوفنى مش انها محتاره

 اللى رعبنى إنّى حسّيت انها شايفه الدنيا عباره عن دراسه و مذاكره و بس

 سكت للحظة كده أفكر أرد عليها ازاى و أوصلها نصيحتى ازاى !!!

قلتلها حبيبتى ينفع تاكلى خيار بس و تسميها سلطه قالتلى لا

 قلتلها طيب ينفع تاكلى طماطم بس طول الوقت من غير ما تزهقى ردت و قالت لا

 قلتلها تمام طيب تقدرى تاكلى فلفل او جرجير او خس بس طول عمرك و تقنعى نفسك انها سلطه

 كانت ابتدت تزهق منى و ردت بملل لا لا و الله لا

 قلتلها يعنى طبق السلطه لازم يكون مكس ، خليط يعنى من طماطم ، فلفل ، خيار ، جزر ، خس و جرجير و كده علشان تسميه سلطه ، علشان يعجبك ، علشان تتبسطى و تاكليه !!!!

قالتلى اه طبعاً !!!!!

قلتلها اهى حياتك لازم تبقى عامله زى طبق السلطه ، مزيج و خليط من حاجات كتير علشان تحبيها …..

اوعى فى يوم يكون تركيزك فى عنصر واحد و تنسى الباقى لأنك هتملى منها و تزهقى ،،،،،،

 حياتك عباره عن أهل و أصحاب و دراسه و مذاكره و شغل و ترفيه ونوم و راحه ،،،،

 اوعى حاجه فيهم تكون لوحدها محور اهتمامك او مصدر سعادتك ،

 حبيبتى خلى حياتك دايما طبق سلطه !؟

اقرأ للكاتبة : 

نكمل اللى ابتديناه

شكرا للتعليق على الموضوع