يوميات دينا ابو الوفا … عارفين

أكبر خدمه نقدمها لنفسنا ، اننا نحوط روحنا باصحاب جدعان ، اصحاب بجد ، اصحاب بكل ما تحمله الكلمه من معانى ……

اصحاب ايا ما كان المكان اللى هتقابلهم فيه تتبسط و تستمتع ….

تقعد فى اوتيل فايف ستار مرضى ، تقعد فى مطعم شيك اوك ، او تقعد على الرصيف و تاكل درة برضه مبسوط  !!!!!

الصاحب اللى ترتاح فى وجوده و تلاقى نفسك ، وهو فى بيتك ممكن تقعد معاه على الارض و تربعه رجليكم كده ، وفى ايدكم كباية شاى بالنعناع و الوقت يسرقكم و إنتوا الكلام مخلصش ، لا ده انت بتحس ان الكلام لِسَّه مبتداش….

الصاحب اللى معاه بتكون انت انت بجد على طبيعتك وسجيتك

 لا بتحسبها و لا تفكر فى حاجه و انت معاه

 الصاحب اللى لما تضيق بيك الدنيا و تحس ان كل حاجه حوليك وحشه وتفتكر انه موجود فى حياتك تحس ان الدنيا لِسَّه بخير

 الصاحب اللى مجرد ان نمرته موجوده فى تليفونك ، محسسك بأمان و راحه ……

من الاخر الصاحب الجدع ، اللى بحق و حقيق ….

طبعاً مش سهل نلاقيه و هو من امتى الألماظ و الدهب و الأحجار الكريمه تلاقيها بالساهل !!!!!

لازم تتعب و انت بتدور ، بس بأمانه يستاهلوا التعب

 يستاهلوا التخبط اللى بنعيشه وقت كبير مع الصحاب الغلط ، الصحاب الى أى كلام ، الصحاب الفلصو …

عارفين …كمان مفيد قوى تشوف الوحش ، فأوعى تندم أو تزعل انك قابلته ،لانه ده اللى بيخليك تقدر الحلو ..

 الأسود هو اللى بيخليك تعرف الأبيض ..

 و الضلمه بتخليك تستنى النور ..

 والحر بيخليك تحب نسمة الصيف ..

 و البرد يخليك تشتاق لشمس دافيه ..

 و البكا يعرفك قيمة الابتسامه ..

 زى بالظبط ما الصاحب الفلصو يعرفك قيمة الصاحب الجدع لما تلاقيه ..

 يا بخت اللى فى حياته صاحب جدع ..

اقرأ للكاتبة :

الحب … ان تسقط الاقنعه أمام من نحب

شكرا للتعليق