يوميات دينا ابو الوفا … عارفين
قليل مننا فى الدنيا دى عايشين فيها بما يرضى الله ، دغرى كده ميعرفوش اللف و الدوران ،زى قطار ماشى على القضبان ميعرفوش يحيدوا عنه ، كلمة الحق يقولوها لو على رقابتهم ، الصح صح و الغلط غلط ،عندهم الشجاعه اللى تخليهم يقفوا فى وش الغلطان و يعارضوه ، ميعرفوش اللون الرمادى ، كل حاجه عندهم يا أبيض يا أسود ، يقولوا للأعور انت أعور فى عينه…..
أهى الناس دى اكتر ناس مظلومه فى الدنيا لانها نادراً ما بتلاقى اللى يقدرها و يفهمها ….
بيتعاملوا من معظم اللى حواليهم على انهم كائنات غريبه من الفضاء الخارجى نزلت غلط كوكب الارض …
و النتيجه انهم بيعيشوا حياة صعبه و قاسيه لأنهم بيتكلموا لغه غريبه محدش فاهمها غيرهم …..
ولو حبوا يعيشوا طبيعى كده بين الناس و ينصهروا فيهم ، لزماً و لابد يتغيروا …..
يبقوا حلوين كده و يكون الرمادى لونهم المفضل و التلاعب ،الكدب ، التطنيش ، التغافل ، اللف و الدوران ، التحايل ، الخبث من سماتهم الأساسيه علشان يسلكوا
يقلعوا توب موضته قديمه و يلبسوا توب العصر !!!!!
بكده ينجحوا انهم يعيشوا وسط بنى الارض …
اقرأ للكاتبة :
