يوميات دينا ابو الوفا … عارفين
العمر مهما طال .. قصير ….
دى حقيقه لازم نفضل فاكرينها كويس و حطينها دايما قدام عنينا ….
لان الحقيقه دى ، بيترتب عليها حاجات كتير اوى ، أهمها انك تعمل لآخرتك اللى انت مش عارف جايه امتى !!!!!
بس مش ده اللى انا ناويه أكلمكم فيه لانه شىء مفروغ منه و بديهى و اللى مش بيفكر فيه ، شخص مغيب وخسران خسران مفيش شك ….
لكن اللى هكلمكم فيه حاجه تانيه خالص و هى علاقاتك بمن حولك ..
لما تبقى عارف ان العمر قصير يبقى ميصحش ابدا تضيعه و تقضيه مع الناس الغلط …..
مينفعش تقضيه مع حد مش بيقدرك ، مش عارف يحترمك ولا ينفع تقضيه مع ناس مش بتحبك من قلبها …. ليه !؟
ايه اللى يجبرك على كده …الحقيقه مفيش ولا سبب واحد وجيه !!!!!
مينفعش و انت عارف ان عمرك قصير تشتغل شغلانه مش بتحبها و مش لاقى فيها نفسك ، تنزلها كل يوم و انت مخنوق …. برضه ليه عشان ايه !؟؟
و لا ينفع مثلا تفضل مربوط فى علاقه زوجيه فاتره ممله تعيسه لمجرد ان التغيير فكره مخيفه بالنسبه لك ……
و كمان ميصحش تحتفظ فى حياتك بناس الاسم اصحاب و فى الحقيقه انهم فلصوا ووقت الشده يخذلوك ، على ايه !؟!؟
صدقنى و لا تسوى وجعها !!!!!!
باختصار شديد مينفعش ترضى بأقل القليل فى العلاقات الإنسانيه …
ده ممكن تطبقه فى الماديات لكن مش فى علاقاتك بالآخرين….
لان الاثار السلبيه اللى بتسيبها جوانا صعب تتمحى و الضغوط اللى بنتحملها بتكسر ضهرنا و بيخلص العمر و احنا لِسَّه بنحاول نطلع من دايرة الندم على العمر اللى راح و انقضى مع ناس غلط و حاجات غلط ……
طب و الحل …..
الحل انك لازم باستمرار تغربل كل حاجه فى حياتك و تعيد تقييم أهميتها و فايدتها و قيمتها وتاثيرها عليك ….
دا العمر لحظة …
اقرأ للكاتبة :
