نانسى فتوح تكتب : ورقة الشيكولاته

ساعات كتير في حياتنا بنخدع نفسنا بنفسنا للأسف .. ونبص على أي حاجة في حياتنا من شكلها الخارجي فقط .. بقينا نحكم على الأمور من قشرتها الخارجية ونقرر نشتريها من شكلها الظاهري..

زي مابنتعامل بالظبط مع ورقة الشيكولاته لماتلاقيها ملونة وجميلة وتشد انتباهك وتلفت نظرك … عشان تختارها من وسط أنواع كتير تانية وتشتريها هي دي بالذات عشان عجبك شكلها ..

وبعدين بعد ماتاخدها وتفتحها .. بتتفاجئ في اللحظة دي بالحقيقة إن الشيكولاته لونها إسود ومش ملونة زي ماكنت فاكر … وإن طعمها في لسانك مر ..

وهنا بقى تبتدي تعرف إن إنت إتضحك عليك بشكل الورقة الملونة، اللي انت أول حاجة رميتها ..

وفي اللحظة دي هتعرف إنك خسرت كتير ، وإنك حسبتها غلط .. وإنك اهتميت بالشكل فقط مش بالجوهر ..

وإنك كان لازم تسأل .. وتسأل .. وتاخد خبرة من اللي قبلك .. وإن في حاجات كتير في حياتنا مهمة جداً ومحتاجة تريث وتدرس الموضوع بعقلانية كويس أوي قبل ماتاخد خطوة وتبتدي فيها وتقرر عشان ماتندمش على الاختيار ..

وخلي بالك .. غالباً في الوقت ده وأثناء الفترة دي بتكون مشوش ومش قادر تحدد المسار والطريق .. بس مهم أوي التريث .. وبقدر الإمكان إنك تتعامل بخبرة اللي قبلك ، ومساعدة بعض الناس اللي عندهم حكمة وتعقل بيكونوا هم الضوء اللي بيرشدك ويمهدلك الطريق ..

وفي النهاية خلي بالك لإن كل تجربة إنتي أو إنت بتمر بيها سواء كانت بسيطة أو كبيرة، من وجهة نظرك هي محسوبة عليك .. لإنها خدت جزء من تفكيرك .. وشغلت مساحة من أحاسيسك ومشاعرك .. وخدت وقت من عمرك ..

كل ده لازم انت بس اللي تقيمه .. وتوزن مدى الخطوة اللي تقدر تخوض بيها التجربة واللي تقدر تاخد بيها القرار الصحيح.

 لإنفي الآخر حياتنا كلها أغلبها اختيارات .. والاختيار قرار..

 وقرارتنا دايماً بتبقى بإيدينا وبتتحسب علينا، لإن مسار حياتنا كله بيترسم بنتيجة اختيارك ..

صحيح المستقبل بإيد الله بس أكيد لازم تاخد بالأسباب و تتأنى فيه،وتهتم أوي بالجوهر ..

وماتحاولش تبص عليه بمنظور .. ورقة الشيكولاته.

اقرأ للكاتبة :

من يدفع الثمن ..!

شكرا للتعليق على الموضوع