كلمات ادم … رثاء ضياء غنيم
مع إن عودك منحني مبيترويش
قادر تعيش
قادر تقول والشعر جواك انتصر
ليه انكسر
قدام حاجات مبتتحكيش
قدام قصيدة بتبتديها بألف معني متنتهيش
قدام حاجات …
ممنوعة لعيون البشر
قدام صور…
ترفض براويز الحياة
عيل ما بين صوته وصداه
خيطه الضعيف
وبخيط ضعيف
يوصل مابين تِوَك النهار …
وضفاير الليل الكفيف
خيطه الضعيف
ماقدرش إنه يحتمل حمل الزمن
الناس قالولى الشعر مش حزن وشجن
الشعر معناه الجمال
الشعر أفراح الوطن
عايزِينّي أقول ما أحلى الورود
عايزِينّي أقول الحب شئ مالهوش حدود
عايزني أكون قاضي السعادة
والقصيدة من الشهود
وانا مش هقول غير اللى حاسّه
مش مهم الناس يحسّوا
دا الجواب عندي ف سؤال
والسؤال مليان ردود
السؤال …..
الغصن لو مات واندفن
يقدر على طرح الورود ؟!
ف ازاى أقول ما أحلى الورود
وازاى أقول الحب شئ مالهوش حدود
وازاى اكون قاضي السعادة
والقصيدة من الشهود
ازاي أكون ؟؟
وكوني ماعادش بيساعني
وكوني بغني إيه يعني
ما دام الغنوة بتسمع
بصوت ممنوع
ومهما اللحن بيدمّع
ماهوش مسموع
كصوت الغربة بيسافر
مالوهش رجوع
أنا الموجوع
بقول يمكن … وأقول جايز
لا أنا عايز
أطول الشمس باديّا
ولا عايز اكون للصبح فجرية
ولا وسط الزحام ابقي
ك نسمة صيف معدية
يادوب عايز …
أكون نفسي …
أكون بحلـم …
أشوف الحلم لو حتي يكون مشروط
ما بين النبض والتاني
عروق بتموت
بعلو الصوت
حاجات جوايا تتصارع
وأنا المسجون
بشوف الكون
بيتفرفط فى غيط مسكون
الاقي الطرح يتبدل
ضلام وسكوت
يموت ضي الفنار لكن
بتتشكل مواني الموت
وليه الشارع الفاضي مبيسعنيش
متستنيش … أعود تانى
مادام الدنيا رفضاني …
متلزمنيش
أموت يمكن … أعيش بينكم
يجوز تفتكروا أشعاري فتلزمكم
يجوز تحتاجوا أوجاعي تعلمكم
يجوز إني أعيش بينكم
……….
الله يرحمك يا #ضياء_غنيم … انا لله وانا اليه راجعون
اقرأ للشاعر :
