يوميات دينا ابو الوفا … عارفين
احساس اليأس وحش قوى ،،،،
الإحساس اللى بيتملك منك ساعات كتير ده فى حياتك !!!!
تلاقى نفسك مش عايز حاجه خلاص
مش عايز تحلم تانى و لا تتمنى تانى
زى ما تيجى تيجى ،،،،،
زهدت فى كل حاجه و كل حاجه بقت محصله بعضها
مش قادر تجرى ورا هدف و لا حلم …
لأنك كل ما تجرى بتبقى عامل زى اللى بيجرى على تريد ميل، نفسه بيتقطع و بيتعب و بيعرق لكن لا بيوصل لمكان و لا بيلحق حاجه…..
بيفضل واقف محلك سر منبهوش غير التعب
و ساعات بيبقى احساس انك بتجرى على الطريق علشان تحصل علامه عليه
شايفها من بعيد
كل ما تجرى فى اتجاهها العلامه تبعد
كل ما تجرى اكتر العلامه تبعد اكتر
تقرر فجأه تقف ، تزهق ، تمل ، تتخنق ، تبص حوليك تلاقى اللى زيك رمى الفوطه ووقف و مش قادر يكمل
ساعتها لما اليأس يتملك منك بتكمل حياتك زى الروبوت ،
اقولك ازاى،،،،
بتنام بالليل و انت عارف انك مش هتحلم و تصحى و انت عارف انك مش هتوصل لحاجه
تاخد دش بشكل آلى انت مش متأكد المياه ساقعه و لا سخنه مش فارقه
أهو دش و السلام !!!!!
تلبس بشكل آلى ، تمد ايدك تلبس اى حاجه لايقه مش لايقه مش قصتك أديك لبست و السلام !!!!!
تدور عربيتك و تسوق بشكل آلى لا شايف الطريق ولا مميز حاجه حوليك و تقول لنفسك العربيه عارفه سكتها !!!!
توصل شغلك وتقعد على مكتبك وتشتغل لكن فى حاجات مهمه قوى ناقصه …. الشغف ، الدافع ، الحافز و الطاقه الإيجابية !!!!
يخلص يومك تروح ،،،
تنسى تنور نور عربيتك لأنك محستش انها ضلمت ما هى كانت ضلمه من الاول
تغير هدومك فى حركات ميكانيكية بحته و تاخد دش و برضه مش فارق معاك المياه أخبارها ايه
تبص فى ساعتك تلاقيه ميعاد نومك المعتاد تقوم نايم و السلام !!!!
قد ايه اليأس وحش و احساس الروبوت وحش
اقرأ للكاتبة :
حتى مع نمر الرأفه برضه بيسقطوا …
