يوميات دينا ابو الوفا … عارفين
اتسالت سؤال وجيه جداً من أحد أصدقائى “هو امتى الواحد يقول انه فشل ؟! ” هل عدم تحقيق الهدف فشل ؟!؟
يمكن فى الاول استغربت السؤال لانه بالنسبه ليه الاجابه سهله بديهية معروفه !!!!
ليس هناك ما يسمى فشل … فعلاً مفيش الا فى حاله واحده
طول ما انت حاطط هدف قدامك ده فى حد ذاته نجاح ،،،، انك محدد هدف ،،، ليك حلم ،،،،
طول ما انت مرتب افكارك و مخطط لخطوات الوصول للهدف ،ده فى حد ذاته نجاح ،،، لأنك محدد معالم و نقاط متابعه خطتك ،،،،
طول ما انت ماشى بخطى ثابته وواثقه فى اتجاه الصوره الجميله اللى انت راسمها لمستقبلك ، ده فى حد ذاته نجاح ،،،، لأنك لا كليت و لا مليت ،،،،
طول ما بتعدى فوق العقبات و تخطى الصعاب ، ده فى حد ذاته نجاح ،،، لأنك لا استسلمت و لا خفت و لا شكيت فى قدراتك،،،،
طيب لو رجعت خطوه خطوتين لورا
ده فشل !!!!
برضه لا
ساعات مطلوب نرجع ورا شويتين علشان نشوف الصوره بشكل أوضح وأشمل ، نعيد تقييم الموقف و يمكن بعدها نحتاج نغير بعض الخطوات و التكتيك وده طبعاً مش غلط ….
عادى جداً …. ده اسمه اجراء تصحيحى ،،،
طيب ايه الحاله الوحيدة اللى يحدث فيها الفشل
اقولك ،،،،،،
لما تقرر !!!!
ايوه لما تقرر انك مش عايز تكمل ، لما تدى ضهرك للصوره الجميله اللى انت راسمها لنفسك و تمشى فى الاتجاه العكسى
لما تقرر أنك ترمى الفوطه و تنسحب من الحلبه خوفاً من العقبات لتديك الضربه القاضيه و تجيبك الارض ….
لما تفقد الثقه فى نفسك ، فى قدراتك ، فى إمكانياتك.
لما تسمح لغيرك يقرر لك مقومات فشلك و نجاحك و تديله الحق يلقبك بالفاشل
هنا تبقى فشلت بالفعل
الفشل هو قرار منك ليك !!!!!
اقرأ للكاتبة :
اكسبنا قوة الشخصيه و حكمة العقل و صلابة القلب
