يوميات دينا ابو الوفا … عارفين
من اكتر الأوقات اللى بحبها اوى ، هو وقت الأعياد …..
مش بس علشان الناس بتبقى حاسه ببهجه و فرح و تفاؤل…..
و لاعلشان بيبقى اجازه و فتره راحه و استجمام من ضغوط الحياه ،،،،
و لا علشان اللبس الجديد و إحساسك بيقظة الطفوله اللى على طول مستكينه جواك،،،
و لا علشان السفر و الخروج و الفسح و الغدا و العشا الخ الخ ….
لكن عشان حاجه تانيه خالص اهم من كل ده …
عارفين ايه !!!!
علشان فى العيد بتعرف فيها قيمتك و قدرك و مكانتك فى قلوب الناس ….
فى زحمة الدنيا اليوميه اللى بتتوهنا بعيد عن الناس اللى بنحبهم
و فى دوامة الحياه اللى بتجرفنا بعيد عن اللى بنعزهم
غالباً مش بنلاقى وقت نقولهم فيه أنتم على بالنا ، والله معزتكم كبيره عندنا ، والله أنتم جوه متربعين فى قلبنا …..
لكن فى العيد بقى الدنيا بتختلف تماماً
كلنا بنهدى كده و نركز ، و بنكون فى فترة هدنه مع جرى الوحوش اللى بنجريه طول الوقت !!!!
بنلاقى بقى نفسنا تلقائياً من اول ما العيد يخبط على بابنا ، بنمسك تليفوناتنا و نتفقد لستة الأسماء الطويلة العريضه اللى جواه ، و نزيح من عليها تراب تراكم من كتر الركنه !!!!!
ونبتدى نتواصل بجد مع الناس اللى فعلا بنحبها
و على قد المحبه بيكون الوصال
الغالى اوى اوى ده بتكلمه مكالمه طويييييييييله و بتكون عباره عن سرد سريع لملخص حياتك من ساعة ما كلمته اخر مره ، اللى انت مش فاكر كانت من امتى و انت كمان تسمع بلهفه موجز أنباؤه !!!!
و بعد كده تيجى المكالمة القصيره اللى بتعملها لأنك محتاج تسمع صوتهم و هم بيعيدوا عليك و هم كمان يسمعوا فى صوتك اشتياقك ليهم ….
و بعد كده تيجى الرسايل ، الرسايل اللى بنكتبها بايدينا لان اللى عايزين و محتاجين نقوله مش موجود فى اى رساله جاهزه …..
و فى المقام الرابع تيجى الرسايل الجاهزه على هيئة صوره او كلام كلاشيه ، اللى بنبعتها الحقيقه لمعظم اللسته مره واحده ، خابطه واحده!!!!اللسته دى تعرف انهم على قدر واحد من الاهميه و المعزه عندك
و اخيراً بقى تيجى شوية اسماء كده مش بتطاوعك نفسك تبعت لهم اى حاجه و فى لحظة صدق مع النفس بتشعر بالنفاق و الرياء لو ايدك اتمدت و بعتت !!!!!
هنا بقى بيكمن سبب حبى الشديد للعيد لانى بشوف انا فين عند الناس و هم فين عندى !!!
اقرأ للكاتبة :
مستعدين يفصلوا حياه جميله و لا لأ
