يوميات دينا ابو الوفا … عارفين
أوقات كتير بنتصرف فيها على غير طبيعتنا لدرجة اننا بنستغرب من نفسنا ……
بيبقى كأن جوانا شخصين ، واحد جميل اوى و التانى وحش ….
الشخص الجميل عمداً بنخبيه ،و التانى بالعافيه بنظهره !!!!
يمكن بنعمل كده ظناً منا ان محدش هيقدر يغير طبيعتنا اللى هى اقرب ما تكون الى المثاليه فى كل شىء ……
و يمكن بيكون سببه خوفنا و محاوله مننا لحمايه نفسنا من استغلال الاخرين لشخصيه فى نظرهم طيبه الى حد السذاجه !!!!!
شخصيه سهل التلاعب بيها و الضحك عليها
بنلاقى نفسنا حريصين زياده و حذرين حبتين فى التعامل مع الاخرين …..
لا حبتين ايه …
ده احنا بنكون حذرين لدرجه البارانويا ….
بنحلل كل كلمه بتتقال لنا ، كل تصرف بيتعمل معانا و نعيش فى افتراضات و هواجس ملهاش آخر !!!!
بنكون فعلاً شخص صعب ، بل مستحيل التعامل معاه ، صعب اختراق حصونه المنيعه ، صعب عبور حواجزه الصلبه ، صعب كسب ثقته …..
بيكون صعب اوى حد يبعث من جديد الشخص الجميل اللى جوانا و يعيده للحياه !!!!!
و برضه بيكون صعب يتعامل معانا و يتحملنا كده زى ما احنا !!!!
و كل مدى بنتعود على الشخص اللى مش شبهنا ، و يوم ورا يوم بيغلب علينا طباعه لدرجة اننا حتى لما نحاول نستعيد طبيعتنا مش بنعرف و كأن حصلها ضمور !!!!
كأنه لم يعد لها وجود ، اختفت ، ماتت ، ادفنت ….. الله اعلم
المشكله الحقيقيه مش مع نفسنا لأننا فعلا مع الوقت بنتأقلم مع الشخص الجديد و بنوصل لدرجة اننا بنتصالح معاه و بنتعايش عادى جداً ..
المشكله بتكون فى كم الناس الكويسه اللى بنخسرها بسبب خلطنا الحابل بالنابل و فشلنا الذريع فى تحقيق التوازن ما بين الشخصيتين ،،
اقرأ للكاتبة :
هكذا حياتك…. لا يهم ان تبدو ممتلأه
