يوميات دينا ابو الوفا … عارفين
من اكتر العلاجات الفعاله لخنقة النفس ايه !!!!
القاعده على البحر …..
تاخد شيزلونج جميل ، فى ضلايه طراوة …. تمدد عليه و ترمى ضهرك لورا ….
ايوه ووسطن نفسك قدام البساط الأزرق بدرجاته ، ملى عينك من ابداع الخالق فى مزج اللون
الله عليه و هو هادى ، هدوئه معدى بسرعه شديده !!!
تلاقى جسمك بيرخى و السلاسل اللى كانت مقيداك و ملفوفه داير ما يدور حوليك بتفك ….
تفضل عنيك مركزه فيه و كانك بتاخدله بعينك صوره ،
و شويه كده و تلاقيه بينادى عليك بشويش ، بيغريك تنزله ….
و مين يقدر يقاوم نداه ، كل واحد على طريقته ،،
فى اللى يقف على طرفه و يسيب المياه تزغزع رجليه رايح جاى
و فى اللى ينزل حته صغيره و يسيب البحر يحضنه حضن دافى شافى
وفى اللى جرىء ينزل للاخر ، و يلاعب البحر يرمى نفسه جواه و يتغطى بيه
برغم اختلافنا عن بعض فى تلبية الدعوه، الا انه من المؤكد ان كلنا بنغسل فيه همومنا ، و ندوب فى منتهاه أحزاننا و نغرق فى قاعه أوجاعنا !!!!
ساعات كمان بيورد على البعض مننا خاطر و احنا قاعدين ، الا وهو ان الأحلام اللى بنحلمها زى البحر و تحقيقها ميجيش بالقاعده على الشيزلونج و الاكتفاء بالفرجه من بعيد …
لازم تسعالها ، تتحركلها ، تروحلها …
ممكن طبعا و انت بتحاول تحققه تكون حريص شويه ، خواف شويه فتقف على البر رجل بره و رجل جوه …
و فى ناس تحسب المجازفه و تخوض التجربه و هى نص بره المياه ونص جوه …
وفى بقى الجرىء اللى قلبه ميت ، يغطس و يعافر مع الموجه ولا يهمه …
الفكره دى مجرد انها تخطر فى بالك بتجدد آلامل جواك و تحفزكً على الاستمرار
و يا سلام بقى فى وسط كل ده ، لو عندك سر نفسك تحكيه ، محتاج حد يشاركك فيه ….
بسيطه انزل على الرمله ، طبطب عليها بايديك ، استاذنها تفضفض ليها …
و اكتب كل اللى يخطر فى بالك و سيب الموجه تعدى تاخد سرك و تدفنه ……
فعلا …… للبحر فوايد
اقرأ للكاتبة :
كم الناس الكويسه اللى بنخسرها بسبب خلطنا الحابل بالنابل
