يوميات دينا ابو الوفا … عارفين
بيحصل كتير اننا نخسر ناس و بنلاقيهم فجأه انسحبوا و خرجوا من حياتنا …
و نبقى مش فاهمين هو ايه اللى حصل ، طيب ايه الأسباب ، طيب عملنا ايه ….
و طبعاً زى طبيعة كل البشر فى معظم الأوقات ، بيكون اسهلنا كتير اننا نطلع نفسنا الطرف المظلوم مش الظالم ، الطرف المجنى عليه و ليس الجانى !!!!!
بيكون اريح بكتير لينا، اننا نوجه لهم صوابع الاتهام ، الاتهام بالخيانه ، و انهم تخلوا عننا بمنتهى البساطه …
ولا عمرنا بنفكر نوجه مره واحده صوابع الاتهام دى علينا.. .
عمرنا ما بيخطر فى بالنا ، ان انسحابهم و قرارهم بالرحيل و البعد ممكن اوى يكون رد فعل لافعالنا احنا شخصياً!!!!!
من أهم شروط نجاح اى علاقه أيا كان نوعها ، علاقه صداقه ، علاقة زماله ، علاقه حب ، زواج ، اى اى علاقه ، بتحتاج فى الأساس اهتمام
اهتمام بس ؟! ، اقولك لا ، الشرط كده ناقصه حاجه مهمه جداً…..
الأصح هو ، الاستمرارية فى الاهتمام …
لو حد فعلا بيفرق معاك ووجوده فى حياتك مهم ، مينفعش ابدا تمشى معاه على سطر و تسيب سطر ….
النهارده مهتم بيه ، بتفكر فيه ، بتحن ليه و بكره تهمله و تنساه و تزهده !!!!!
مينفعش يوم يحس انه بالنسبه ليك كل حاجه ، و اليوم اللى وراه انه ولا حاجه !!!!
مينفعش التقلب المستمر فى العلاقه …
لأنك هتسيبه حاسس انه مش فاهم اى حاجه خالص ومش فهمك انت شخصياً …..
مش قادر يحدد قيمته الحقيقيه عندك ، مش قادر يحدد مكانته و منزلته فى قلبك!!!
مش قادر يجاريك فى ذبذبتك و يطّلع و ينزل معاك ، كتير عليه …
و النهايه الحتميه انه بدل ما يقبل على نفسه نار الحيره ، بيفضل نار البعد حتى لو كنت أغلى حد فى حياته …..
لو عايزنى اثبتلك أهمية الاستمراريه فى الاهتمام، بدلا من مجرد الاهتمام …
جرب تسقى ورده او زرعه ، يوم اه و يوم احرمها من الميه ….. هتموت صح !!!
طيب تعالى بقى بعد ما تدبل وتموت و جرب تسقيها تانى !!!
و نرجع نزعل منها و نتهمها انها ماتت … وصلت !!
اقرأ للكاتبة :
يكون مثل زهرة الياسمين تفوح برائحتها العطره أينما ذهبت او لا يكون ..
