يوميات دينا ابو الوفا … عارفين
من أروع اللحظات اللى ممكن تمر عليك فى حياتك ، هى اللحظات اللى بتقابل فيها أصدقائك بتوع زمان ، اللى عرفتهم و انت فى بداية حياتك …..
الأصدقاء اللى شافوك وانت لِسَّه صغير قبل ما الزمن يرسم بريشته على ملامحك و يبدلها ……
الأصدقاء اللى عاشوا معاك ايام و ليالى و جمعتكم قصص و حكايات …
بيكون للقائك بيهم طعم حلو تدوقه لحظة ما تشوفهم قدامك …
و تلاقى فرحه غريبه مليه قلبك من جوه …
و ابتسامه حقيقيه مرسومه على شفايفك …
بيكون لقائك بيهم ، بمثابة لقاء بذاتك اللى نسيتها مع الوقت او بمعنى أصح تناسيتها ….
لما بتقابلهم بيفضلوا يقولولك انك لِسَّه زى ما انت ، و ان ملامحك زى ما هى متغيرتش ، برغم ان مرايتك كل يوم بتأكدلك انك اتبدلت و كبرت …….
طيب ايه السر فى انهم شايفينك زى ما انت !!!!!
ببساطه شديده ، لأنهم بيبصولك بقلبهم اللى عرفك و حبك زمان …..
و بيشوفوا فيك ملامحك اللى جوه مش اللى بره واللى اتحفرت فى ذاكرتهم …
و برغم ان ده فى حد ذاته جميل الا انه اجمل ما فى اللحظه دى انهم بيكونوا مرايه تعكسلك اللى شافوه …..
تعكسلك نفسك زمان و تشوفها بعد طول غياب وتجيلك الفرصه اللى تاخدها فيها بالحضن بمنتهى الشوق واللهفة …
اقرأ للكاتبة :
