مجدى قاعود يكتب : الضريبة العقارية باختصار وبساطة
ثار الجدل مؤخرآ حول قانون الضريبة العقارية ، فمنذ صدور تعديلات قانون الضريبة العقارية كان لنا وقفة وشرح توضيحى من أول نوفمبر عام ٢٠٠٩، ويطيب لنا اليوم عرضه مرة أخرى لبيان عدم وجود جديد فى القانون سوى التعديل الذى أشرنا إليه فى مقال سابق..
ونعود فنقول ماقلناه منذ سنوات
مبدئيا اذا كان عندك عقار أيا كان نوعه و غرضه لازم تسجله في اقرب مكتب الضرائب العقارية في منطقة سكنك أو في منطقة العقار ملكك.
من خلال اسئلة تعود الكثيرون على طرحها
ـ هو القانون دا اتعمل امتى؟
الضريبة العقارية موجودة من زمان و كان اسمها العوايد و في سنة ٢٠٠٨ اتعمل قانون الضرائب العقارية و فعل في التسجيل لكن لم يفعل في التحصيل لأسباب كتيرة.. منها عدم اكتمال حصر و تقييم الوحدات و أحداث سياسية في ٢٠١١ لغاية لما تم تفعيله في ٢٠١٤ مع إضافة بعض التعديلات نظرا للمتغيرات اللي حصلت في مصر.
ـ الضريبة مفروضة على ايه بالظبط؟
الضريبة دي بتشمل كل أنواع العقارات المبنية في مصر (ما عدا الغير خاضعة للضريبة زي الجوامع و الكنائس و المستشفيات… )، يعني اللي بيخضع للضريبة فقط المساكن الخاصة و الوحدات الإدارية و التجارية الشاليهات، و بتشمل كمان الأراضي البيضاء المستغلة في نشاطات تجارية زي المخازن و الجراجات و المشاتل أو غيره و اي نشاط تجاري.
ـ كل الناس هتدفع الضريبة العقارية دي؟
لا طبعا.. مسكنك اللي انت بتقيم فيه بس معفي .. إلا لو قيمته السوقية زادت عن ٢ مليون جنيه او لو تمتلك اكتر من مسكن أو عقارات اخرى ..
ـ طيب امتى هدفع الضريبة العقارية؟
زي ما قلنا لو قيمة الوحدة العقارية السكنية بتاعتك تجاوزت 2 مليون جنيه أي ما يساوي قيمة إيجارية سنوية أكتر من 24 ألف جنيه، أما لو قيمة وحدته أقل من 2 مليون جنيه مبيدفعش ضريبة عليها إلا لو كان بيمتلك أكتر من وحدة عقارية.
يعني لو إنت عندك وحدة عقارية سكنية واحدة قيمتها ١,٩٩٩,٩٩٩ جنيه فبيتم حساب إن قيمة إيجارها السنوي أقل من 24 ألف جنيه فمش هتدفع عليها ضريبة..
أنما لو عندك وحدتين عقاريتين سكنيتين مجموع قيمتهم مثلا 1.5 مليون جنيه، وحدة واحدة منهم بس اللي هتتعفى من الضريبة والتانية هيدفع عليها.
و لو سعر وحدتك السكنية مثلًا 3 مليون جنيه، فبيتم إعفاء أول 2 مليون جنيه من الضريبة، وبتدفع ضريبة على المليون الزيادة.
و زي ما قلنا في المقدمة حتى لو سعر وحدتك السكنية أقل من 2 مليون، لازم تتقدم للضرايب العقارية بإقرار وتسجل عقارك عندهم و تاخد جواب الإعفاء.
– الكلام ده خاص بالوحدة العقارية السكنية أما التجارية والإدارية وغيرها بيندفع عليها ضريبة طالما سعرها تجاوز 100 ألف جنيه أو لو قيمتها الإيجارية في السنة تجاوزت 1200 جنيه.
ـ مين اللي بيحدد قيمة العقارات؟
في لجان مشكلة في كل محافظة مسؤوليتها تحديد سعر العقار وفق معايير محددة زي الحي اللي هي فيه، واتساع الشارع قدامها، ومدى وصول الخدمات لها، ومستوى البناء ( فاخر/ فوق المتوسط/ متوسط/ اقتصادي/ شعبي).
و الناس اللي بتتظلم من تقدير سعر عقارها وحاسه إنه تم المبالغة فيها، ممكن تتقدم بطعن على تقدير اللجنة.
ـ إزاي بتتحسب قيمة الضريبة اللي المفروض أدفعها؟
سعر الضريبة بيكون 10% من القيمة الإيجارية السنوية للوحدة، بعد خصم 30% مصاريف للوحدة السكنية، 32% للوحدة غير السكنية.
لازم تعرف الكلام دا الاول:
ليك حد إعفاء سنوي ٢٤٠٠٠ جنيه لوحدة واحدة خاضعة.
أن سعر الضريبة ١٠٪
و ان حساب الضريبة بيعتمد على صافي القيمة الإيجارية اللي بيتحسب بعد خصم ٣٠٪ من القيمة الإيجارية مقابل مصروفات الصيانة و خدمات العقار.
وعاء الضريبة = صافي القيمة الإيجارية – حد الإعفاء.
– يعني لو إنت عندك مثلًا وحدة سكنية خاصة بك بـ2 مليون جنيه، وقيمتها الإيجارية السنوية 36 ألف جنيه، هيتم حسابها كالتالي:
صافي القيمة الإيجارية السنوية = القيمة الإيجارية السنوية * 70%
صافي القيمة الإيجارية السنوية = 36000 * 70 % = 25200 جنيه
وعاء الضريبة = صافى القيمة الإيجارية السنوية – حد الإعفاء
وعاء الضريبة = 25200 – 24000 = 1200 جنيه
الضريبة = وعاء الضريبة * 10 %
الضريبة = 1200 * 10 % = 120 جنيه سنويًا
– أما لو عندك أكتر من وحدة سكنية، فبيتم إعفاء وحدة منهم والتانية بتدفع ضريبة كالتالي بفرض إن قيمتها الإيجارية السنوية لها 36 ألف جنيه:
صافى القيمة الإيجارية السنوية = القيمة الإيجارية السنوية * 70 %
صافى القيمة الإيجارية السنوية = 36000 * 70 % = 25200 جنيه
الضريبة = وعاء الضريبة * 10 %
الضريبة = 25200 * 10 % = 2520 جنيه سنويًا
– ولو عندك وحدة عقارية غير سكنية (إدارية/ تجارية….) وقيمتها الإيجارية في السنة 2700 جنيه مثلًا، فإنت هتدفع كالتالي:
صافى القيمة الإيجارية السنوية = القيمة الإيجارية السنوية * 68 %
صافى القيمة الإيجارية السنوية = 2700 * 68 % = 1836جنيه
وعاء الضريبة = صافى القيمة الإيجارية السنوية – حد الإعفاء
وعاء الضريبة = 1836- 1200 = 636 جنيه
الضريبة = وعاء الضريبة * 10 %
الضريبة = 636 * 10 % = 63.6 جنيه سنويًا
ـ مين المفروض يدفع الضريبة المالك ولا المستأجر؟
مالك العقار هو المكلف بسداد الضريبة العقارية سواء كان سكني أو تجاري، أما المستأجر فلا يعد مكلف بأداء الضريبة العقارية، لكن بيعد متضامن مع مالك العقار في سداد الضريبة في حدود الأجرة المستحقة عليه، و بينص في عقد الإيجار على تحمل احد طرفيه أو كلاهما الضريبة العقارية.
يعني لو مالك العقار مدفعش الضريبة المستحقة عليه، يحق للضرائب العقارية تاخدها من المستأجر وتعطيه إيصال بها والمستأجر يخصب قيمتها من الإيجار للمالك.
ـ طيب امتى آخر ميعاد لتسجيل الوحدات العقارية قبل الغرامة؟
اللي عنده وحدة عقارية سكنية واحدة، ومتأكد إن قيمتها أقل من 2 مليون جنيه، متاح له لحد آخر السنة يسجل وحدته في مصلحة الضرائب العقارية بدون غرامة.
أما لو إنت عندك أكتر من وحدة، أو قيمة وحدتك تجاوزت 2 مليون جنيه، فلازم تروح قبل يوم 15 أغسطس عشان متدفعش غرامة.
ـ ايه مواعيد سداد الضريبة؟
تستحق الضريبة العقارية في أول يناير من كل سنة، وتحصل على قسطين متساويين، الأول حتى نهاية شهر يونيو، والثاني حتى نهاية شهر ديسمبر خلال نفس السنة، ويجوز سدادها بالكامل في ميعاد سداد القسط الأول.
كمان ممكن يتم التقسيط الشهري، حسب كلام رئيسة مصلحة الضرائب العقارية.
اقرأ للكاتب
