نانسي فتوح تكتب: انت تمتلك مسافات وحدود نفسك

دائما مانسأل أنفسنا عندما يطرح علينا أحد الأقرباء او الأصدقاء سؤال لا نريد الإجابة عليه ولكن نلزم أنفسنا بالإجابة من باب الذوقيات.. ولكن هل هو بالفعل من باب الذوقيات أم فيه تعدي للحدود النفسية؟

من حقك تحدد المسافة بينك وبين الآخرين.. من حقك تحدد مين قريب ومين بعيد منك زي البيت اللي احنا بنعيش فيه.. في ناس ممكن تدخل بيتنا وتقعد في الصالون.. وفي ناس تانية تدخل لغرفة السفرة.. وفي ناس تالتة ممكن اخليها تتجول في البيت وتاخد راحتها بكل بساطة..

نفسك كمان زي البيت.. من حقك تسمح مين يدخل ومين مايدخلش.. مين يفضل على الباب ومين مش مسموحله يقرب من الحدود اللي انت حاطتها..

ليه كل ده.. ليه بنحط كل الشروط دي ونسميه الحدود النفسية؟!

لسبب واضح جدا وهو ان في أنواع كتير من البشر بنتعامل معاهم..

علشان مانخسرش راحتنا النفسية ولا هدوءنا النفسي لازم نعرف إن في أنواع كتير من البشر.. نوع منهم هوايته الاقتحام.. يقتحموا حدودك.. يفرضوا نفسهم على حياتك.. يسلبوا منك الطاقة اللي موجودة جواك ويدخل ويتجول ويحس ان المكان مكانه.. بيقعد ويبدأ في استهلاك مشاعرك.. ويخليك تحس زي ماهو بيحس.. يخليك تحزن مكانه.. وتتألم بداله.. وتشيل همومه بالنيابه عنه.. وبعدين يبدأ في انهاك أفكارك..

فتحتار في مشاكله وتتردد في قراراته وتعاني في كل خطوة يخطيها..

وفي نوع المستحوذ اللي هو يبدأ يمتلك الاخر ويسيطر على مشاعره وتبقى انت بس ليه لوحده.. والمثال ده بيكون موجود اكتر في علاقات الحب والزواج.. دايما التعامل مع هذا النوع في اي علاقة بيبقى محكوم عليها بالفشل لان احد الطرفين لازم بيخسر حياته كلها..

حتى في علاقتنا مع الاولاد.. اوقات بنوصل لمرحلة الاستحواذ لدرجة ان احنا بنخلي أولادنا وبندفعهم انهم يحققوا احلامنا إحنا مش أحلامهم هما.. بيتكلموا بلساننا احنا مش بلسانهم هما…

في ناس بقى ودول أخطر من الجميع بيدوبوا الحدود.. ويزيلوا الفواصل.. لغاية ماتعرفش فين حدودك من حدودهم.. فين الخط الفاصل بينك وبينهم.. فين انت وفين هما..

على النقيض في ناس بيبقوا واقفين على الحدود.. مستنيين الإذن.. مستنيين الإشارة الخضرا.. في انتظار انك تفتح الباب..

وناس رايحة جاية تحوم حوليك كل أملها انك تاخد بالك.. مجرد تاخد بالك.

وناس واقفة هناااااك بعييد.. بعيد جدا.. مش عارفة تقرب ولا تبعد..

قوم بقى اتمطن. على حدودك وراجع المسافات اللي بينك وبين الناس.. شوف مين موجود جوة الصالة.. مين بعيد.. ومين بعيد جدا.. مين مقتحم ومستحوذ.  ومين بيمص دمك..

شوف كمان مين واقف على الباب.. مين مستني الإشارة الخضرا ومين مستني تفتح الباب..

من حقك تحدد مين هيكون فين وإمتي ..

مهم تبقى حدودك واضحة.. وارضك آمنة… ومهم انك تدافع عنها وتحميها ضد اي أذى ومن أي نوع..

تحديد المسافة بينك وبين اي حد حق أصيل ليك زي مهو حق أصيل لكل الناس..

بيتك النفسي ملكك.. مش ملك اي حد تاني..

حافظ عليه لأنه أمانه .. هيسإلك عنها اللي سلمك عقد ملكيته المؤقته يوم ماخلقك..

اقرأ للكاتبة

نانسي فتوح تكتب: التغير من خلال.. والتغير من أجل

شكرا للتعليق على الموضوع