نانسي فتوح تكتب: التغير من خلال.. والتغير من أجل

 التضحية بشكل عام شيء جميل.. الأم بتضحي عشان أولادها والابن ممكن يضحي عشان والديه.. احساس إنك تحس إنك بتحاول تسعد إنسان إنت بتحبه إحساس جميل جداً.. ولكن هل من الممكن إنك تغير من نفسك من شخصيتك ومن مظهرك ومن طريقه تفكيرك عشان ترضي إنسان إنت بتحبه مع إنك غير مقتنع بأفكار الحبيب؟

في الأول خلينا نفرق بين مصطلحين التغير (من خلال).. والتغير (من أجل)..

التغير (من خلال) يختلف تماماً عن التغير (من أجل)..

يعنى احنا بنتغير من خلال تجربة.. بنتغير من خلال خبرة.. بنتغير من خلال علاقة.. مش بنتغير من أجل/علشان حد أو علشان حاجة..

التغير (من خلال) بيكون غالباً تغير حقيقي وعميق ودائم..

التغير (من أجل/علشان) بيكون غالباً تغير زائف وسطحي ومؤقت..

نوضح أكتر؟

نوضح أكتر.. جملة “انا هتغير عشانك”.. الجملة دي سواء كان اللي بيقولها راجل أو ست مينفعش تتصدق.. لإن الواقع والحقيقة إن محدش بيتغير عشان خاطر حد.. ولا في حد بيغير طبعه اللي عاش بيه سنين كثير عشان خاطر شخص أي كان هو مين.. الإنسان لو مش مقتنع إن اللي بيعمله مش صح أو مش مقبول عمره ما هيبطله حتى لو حاول يعمل ده لفتره عشان يريح الشخص اللي معاه هيجي بعد شويه ويزهق أو يحس بضغط لإنه بيكون من جواه مش مقتنع إنه لازم يتغير..

أصدَّق إن فيه ناس بتتغير (من خلال) الحب.. وأثق إن فيه ناس بتتغير (من خلال) اختبارات وابتلاءات الحياة.. وأعلم إن فيه ناس بتتغير (من خلال) المعرفة والتجربة والسفر..

لكن مش باصدّق اللي يقول “أنا اتغيرت علشانك”، ومش باثق في اللي بيدّعى “أنا ها تغير علشان خاطرك”، وباشك في اللي يكرر “أنا بغير من نفسي علشان عيونك”..

أحياناً ده بيكون شكل من أشكال (الرشوة النفسية).. وأحياناً بيكون فخ أوله “اتغيرت علشانك” وآخره “انت مش بتتغير علشانى ليه؟”.. وأحياناً بيكون المشهد الأول في سيناريو الضحية/الجاني: “أنا ضحيت واتغيرت علشانك.. وانت لا”.. وبيكون كثير جداً خدعة مؤقتة لإطفاء حريق علاقاتي ضخم: “خلاص خلاص أنا اتغيرت علشانك هو.. ليه انت لسه زي ما انت! “..

مينفعش تطلب من حد يتغير عشان خاطرك أو تقتنع إن حد هيتغير عشان خاطرك إلا لو هو من جواه عاوز التغير ده يحصل..

 يعني مينفعش ترتبطي بواحد ملوش في الرومانسية وتتوقعي إنك لما تعملي عشا على ضوء الشموع في البيت ده هيغير تفكيره.. لا وكمان تضايقي لما يشوف اللي انتي بتعمليه حاجه تافهة، مينفعش تضايقي لأنك عارفه شخصيته من البداية ووافقتي بيه على كدة..

ومثلا الإنسان اللي طبعه بيحب الخروج والفسح بشكل يومي عمره ما هيعرف يكون كائن بيتوتي عشان شريك حياته عاوز كده ولو حتى عمل ده فبعد شويه هيحس بزهق ومش بعيد يتحول لشخص كئيب ينكد على شريك حياته أصلا..

الخلاصة محدش بيتغير بعد الزواج واللي فيه عيب صعب جدا يغيره الا لو هو اقتنع فعلا انه لازم يغير من نفسه.. غير كدة هيبقى تغيير مؤقت هيقعد شهر ولا اتنين ولو طوِّل هتبقى فترة الخطوبة كأقصى حاجة..

أثق كتير في التغير “من خلال” وأشك كتير في التغير “من أجل أو عشان”

غيروا من نفسكم علشان نفسكم قبل ما يكون عشان حد..

وماتطلبوش من حد يتغير علشانكم.. تبقوا بتضحكوا عليه وعلى نفسكم قبله..

التغير الحقيقي هو علشان نفسك

أنك تكبر في عين نفسك

إنك تحترمها وتقدرها

وعينك ماتتكسرش قدام نفسك..

اقرأ للكاتبة

نانسى فتوح تكتب : الإرادة تكسر المستحيل

شكرا للتعليق على الموضوع