يوميات دينا ابو الوفا … عارفين
أوقات كتير بنتعمد نسهر لوقت متأخر…..
نستنى فيه ان كل اللى حوالينا يناموا
و يعم الهدوء فى المكان و كل الدوشه تختفى ….
نطفى التليفزيون ، نطفى النور ، نطفى كل حاجه ، نقفل باب أوضه علينا ….
بس عشان نستمتع بلحظة صمت ، نسمع فيها السكوت ، نسمع فيها لا شىء …..
نغمض عيوننا ، ناخد نفس عميق ، طالع داخل ، نرمى ضهرنا لورا ، فى لحظة استجمام و انسجام حقيقيه مع نفسنا …..
يمكن ساعات كمان نمد أيدينا و ناخد مخده فى حضننا ،
بتبقى الصديق اللى بنتمناه فى اللحظه دى
الصديق اللى يخدك فى حضنه و يسيبك تفرغ كل اللى جواك من غير ما يقاطعك ، لا ينطق ، و لا يتكلم ، و لا يسال ، و لا يستفسر و لا يلح ……
يسيبك تفرغ الشحنه اللى جواك و تطفى ……
ساعات كمان تقوم تعمل مشروبك الساخن المفضل و تاخده برضه فى حضنك و كانك بتشربه و بتستطعمه لأول مره…..
تتفرج فى الضلمه على الدخان طالع منه و تحس كانه دخان طالع منك ……
تلاقى نفسك بتحكى مع نفسك ، تقول اللى فى نفسك ، تعاتبها ساعات ، تصالحها ساعات ، تأنبها ساعات ، تخاصمها ساعات ، تطبطب عليها ساعات ، تواسيها ساعات ، تهديها ساعات … أهو انت و اللحظه اللى بتعيشها !!!!
اقرأ للكاتبة :
