يوميات دينا ابو الوفا … عارفين
مفيش أدنى شك ان الحياه صعبه ….
كل يوم بيمر علينا ، بنواجه فيه تحديات و صعاب و عراقيل لا نهائيه ……
تجرحنا ساعات ، تُبكينا ساعات ، تكسرنا ساعات ، تُوجعنا ساعات ، تُفقدنا الأمل ساعات …..
بتخلى حياتنا اقرب ما يكون الى سلسله من المعارك المتتالية فى حرب استنزاف لا تنتهى …..
و مفيش قدامنا اختيار غير اننا نصمد و نحارب و نقاوم و نخسر مره و نكسب مره …..
لكن ده مش سهل و لا هين و احنا واقفين لوحدنا !!!!!
لازم نتزود بجيش و سلاح وزاد و زواد …
و مفيش احسن من ناس بجد بتحبك من قلبها ….
ناس معدنها اصيل ، قلبها ابيض ، روحها طيبه ….
ناس انت بالنسبه ليهم الدنيا و ما فيها …
بقاءهم من بقاءك ، سعادتهم مصدرها ضحكتك ، و دمعتهم سببها حزنك ….
ناس مستعده تفديك بروحها و تقف معاك على خط النار …..
ناس ممكن تسمع شكوتك بالساعات من غير ما تكل و لا تمل …
حتى سكاتك تفهمه و تقدره !!!!
ناس شمسها متطلعش غير بوجودك فى اول نهارهم …
و ليلهم ميضويش غير بسلامك فى نهاية يومهم …..
ناس لو دموعك نزلت ، تجرحهم اكتر من حد السكينه …
ناس مش عايزه منك حاجه غير انك تكون مبسوط و سعيد …
ناس واقفه فى ضهرك ، سنداك …
و إحساسك بوجودهم يطمنك و يقويك …
يصبرك على غدر الزمن و خيانة الايام …
ناس تعدلك كفة الميزان و تطمنك ان الدنيا لِسَّه بخير …
تنام بالليل و انت حاسس ان فى ملاك حارس سهران على راحتك …..
الناس دى هى اللى تحافظ عليها و تحطها جوه عنيك …
هم دول جيشك …
اقرأ للكاتبة :
يا ترى أدى فرصه تانيه ولا لأ ؟
